सुरेश जैन यांची धुळे कारागृहातून सुटका

धुळे : घरकुल गैरव्यवहार प्रकरणी गेली साडेचार वर्षे कारागृहात असलेले राज्याचे माजी मंत्री सुरेश जैन यांना सर्वोच्च न्यायालयाने अंतरिम जामीन मंजूर केल्यानंतर आज (शनिवार) त्यांची धुळे कारागृहातून सुटका झाली.

सुरेश जैन यांना प्रमोद वाणी व विनोद वाणी यांनी प्रत्येकी दोन लाख, तर प्रदीप वाणी यांनी एक लाखाचा जामीन दिल्यावर आज त्यांची सुटका झाली. कारागृहाबाहेर जैन समर्थकांची मोठ्या प्रमाणात गर्दी होती. जैन यांची कन्या मिनाक्षी यांनी औक्षण केल्यावर ते जळगावच्या दिशेने रवाना झाले.

घरकुल गैरव्यवहार प्रकरणी जळगाव महापालिकेचे तत्कालीन आयुक्त डॉ. प्रवीण गेडाम यांनी पोलिस स्थानकात गुन्हा दाखल केला होता. प्रकरणी सुरेश जैन यांना 11 मार्च 2012 रोजी पोलिसांनी मध्यरात्री अटक केली होती. कारागृहात साडेचार वर्षे काढली तसेच या खटल्यातील महत्त्वाच्या साक्षीदारांची साक्षही पूर्ण झाल्या या दोन मुद्यांच्या आधारावर जैन यांना जामीन मंजूर करण्यात आला आहे.