शेतकऱ्यांचे प्रश्न सोडविण्यास प्राधान्य देणार- सहसराम कोरेटे

देवरी तालुक्यातील मुल्ला येथे एका कार्यक्रमात सत्काराला उत्तर देताना आमदार कोरेटे

देवरी,दि.14- आपल्या आशीर्वादाने मी राज्याच्या विधानसभेत पोचलो. मी खोटी आश्वासने देणार नाही. कोणत्याही कामाचे कार्यारंभ आदेश असल्याशिवाय भूमिपूजन करणे हा माझा स्वभाव नाही. मात्र, शेतकरी आणि शेतमजूर यांच्या कामासाठी मी सदैव झिजत राहीन, सिंचनाच्या कामांना माझे प्राधान्य राहील. आपण मला आमदार केले. आपल्या विश्वासाला मी तडा जाऊ देणार नाही, असे प्रतिपादन देवरी आमगाव विधानसभा मतदार संघाचे नवनियुक्त आमदार सहसराम कोरेटे यांनी गेल्या रविवारी (दि.12) केले.

ते तालुक्यातील मुल्ला येथे आयोजित एका सत्कार समारंभात आपल्या सत्काराला उत्तर देताना बोलत होते. या कार्यक्रमाच्या अध्यक्षस्थानी कॉग्रेसचे ज्येष्ठ नेते माजी जि.प. अध्यक्ष टोलसिंह पवार हे होते. मंचावर जिल्हा महिला कॉंग्रेसच्या अध्यक्ष तथा जि.प.सदस्य उषा शहारे, माजी पंचायत समिती सभापती वसंत पुराम, मुल्लाच्या उपसरपंच सीमा मडावी, गावतंटामुक्त समितीचे अध्यक्ष रामभाऊ गौपाले, ग्रा.पं.सदस्य चंदन घासले, सेवानिवृत्त शिक्षख दिलीप श्रीवास्तव आदी मान्यवर उपस्थित होते.

कार्यक्रमाचे प्रास्ताविक उपसरपंच सीमा नाईक यांनी केले. यावेळी मान्यवरांनी आपले मनोगत व्यक्त केले. 

कार्यक्रमाचे संचालन नंदू वंजारी यांनी केले. उपस्थितांचे आभार बागडे यांनी मानले. यावेळी परिसरातील नागरिक मोठ्या संख्येने उपस्थित होते.