सूविधा केंद्रासंदर्भात शिक्षक समितीचे तहसीलदारांना निवेदन

20 जानेवारीला 11 केंद्रावर सेतूकेंद्र लावण्याचे आश्वासन

गोंदिया,दि.14 :  महाराष्ट्र राज्य प्राथमिक शिक्षक समिती शाखा देवरी तर्फे तहसीलदार विजय बोरुडे यांना निवेदन देऊन विद्यार्थ्यांना शिष्यवृत्तीकरीता लागणारा जातीचा दाखला व उत्पन्नाचा दाखला संदर्भात केंद्रनिहाय सूविधा केंद्र आयोजित करण्याची  मागणी केली. 

डॉ. बाबासाहेब आंबेडकर शिष्यवृत्ती योजनेअंतर्गत  ओबीसी, व्हीजेएनटी  1 ते 10 पर्यंत शिकत असलेल्या विद्यार्थ्यांकरता महाराष्ट्र शासनाने शिष्यवृत्ती लागू केली आहे. त्या अंतर्गत लागणारा जातीचा दाखला व उत्पन्नाच्या दाखल्याकरिता विद्यार्थी ,पालक व शिक्षकांची मोठ्या प्रमाणात तारांबळ उडत आहे  तसेच पालकांना आर्थिक भुर्दंड सुद्धा बसत आहे  यासाठी महाराष्ट्र राज्य प्राथमिक शिक्षक समिती शाखा  देवरीच्या  शिष्टमंडळाने तहसीलदार विजय बोरुडे  यांना भेटून 11 केंद्रात शिबिर  आयोजित करण्याची  मागणी केली. दरम्यान तहसीलदार बोरुडे यांनी  शिक्षक समितीच्या  निवेदनाची दखल घेत  देवरी अंतर्गत येणाऱ्या 11  केंद्रावर  20 जानेवारीला शिबिर आयोजित केले आहे. या  शिबिराचा फायदा  तालुक्यातील सर्व विद्यार्थ्यांनी घ्यावा  व त्याकरिता लागणारे दस्तावेज  जमा करण्याकरता  शिक्षकांनी विद्यार्थ्यांना सूचना द्याव्यात असे आवाहन  महाराष्ट्र राज्य प्राथमिक शिक्षक समिती शाखेतर्फे करण्यात आले. यावेळी  समितीचे तालुकाध्यक्ष गजानन पाटणकर, सरचिटणीस विनोद बहेकार, जिल्हासहसचिव संदीप तिडके, जिल्हा उपाध्यक्ष जी. एम. बैस, राहुल गणवीर, जिल्हा प्रतिनिधी मिथुन चव्हाण उपस्थित होते.