देवरी,दि,28- शेंडा परिसरात गस्तीवर असताना देवरी पोलिसांनी सागवान लाकडांची तस्करी करणाऱ्या चोरट्यांचा एक मिनीट्रक पुतळीच्या जंगलात पकडला. ही घटना आज मध्यरात्रीच्या सुमारास रात्री अडीचच्या सुमारास घडली.
सविस्तर असे की, देवरी पोलिसांची एक चमू ठाणेदार कमलेश बच्छाव यांच्या नेतृत्वात शेंडा परिसरात गस्तीवर होती. दरम्यान, पुतळीच्या जंगलातून जात असताना रस्त्याच्या एका बाजूला प्रकाशाचा झोत चमकल्याने पोलिस चमू सतर्क झाली. त्या जागेचा कानोसा घेत पोलिस पथक घटना स्थळाकडे येत असल्याचे पाहून वन तस्करांनी तिथून पळ काढला. मात्र, सागवानाचे सुमारे सहा लाकडे भरून असलेला टाटा अश क्र. MH 35 K 5503 हा पोलिसांच्या हाती लागला. सदर मिनीट्रक हा पोलिसांनी सडकअर्जूनी वनविभागाच्या स्वाधीन केला. या प्रकरणी वनविभाग काय कार्यवाही करते,या कडे नागरिकांचे लक्ष लागले आहे. उल्लेखनीय म्हणजे शेंडा आणि लगतच्या जंगलातून होणाऱ्या वनतस्करीवर वनविभागाचे वचक राहिले नसल्याने वनतस्करांचे चांगलेच फावत असल्याची चर्चा सडक अर्जूनी तालुक्यात आहे. वनविभागाच्या सुस्त कारभारामुळे जंगलांचे अस्तित्व धोक्यात आल्याचाही आरोप नागरिकांनी केला आहे. दरम्याने देवरी पोलिसांनी केलेल्या धाडसी कारवाईचे सर्वत्र कौतुक होत आहे. ठाणेदार कमलेश बच्छाव यांचेसह हेड कांस्टेबल राऊत, वसंत देसाई आणि पीएन चौधरी यांनी ही कार्यवाही केली.
No comments:
Post a Comment