गोंदिया,दि.25 : कोरोना विषाणूच्या पार्श्वभुमीवर संचारबंदी लागू करण्यात आली आहे. याचाच लाभ घेत ग्रामीण क्षेत्रामध्ये मोहफुलाची दारू गाळून अवैधरित्या दारू विक्री केली जात आहे, अशी माहिती मिळताच जिल्हा पोलिस दलाने धाड कारवाईचे सत्र सुरू केले. २० ते २२ एप्रिल दरम्यान पाच ठिकाणी धाड कारवाई करून २ लाख ३८ हजार ९१० रूपयाचा मुद्देमाल जप्त केला आहे. या प्रकरणी १२ जणांवर कारवाई करण्यात आली आहे, अशी माहिती जिल्हा पोलिस अधिक्षक कार्यालयाकडून प्राप्त आहे.
लॉकडाऊनच्या काळात अवैधरित्या मोहफुलाची दारू गाळून विक्री केली जात आहे. त्याचप्रमाणे जुगार देखील खेळविला जात असल्याची माहिती जिल्हा पोलिस अधिक्षकांना मिळाली. या आधारावर जिल्हा पोलिस अधिक्षक मंगेश शिंदे यांनी पथकाच्या माध्यमातून धाडसत्र सुरू केले आहे. २० एप्रिल रोजी आसोली येथे देवानंद बन्सोड याला दारू गाळताना पकडण्यात आले. दरम्यान त्याच्याकडून २० हजार ९०० रूपयाचा माल जप्त करण्यात आला. २१ एप्रिल रोजी पांढराबोडी येथील लिखन टेकलाल दमाहे याच्या घरी धाड कारवाई ७ हजाराची दारू जप्त करण्यात आली. त्याचप्रमाणे बरबसपुरा येथे जुगार अड्ड्यावर धाड टाकण्यात आली. दरम्यान घटनास्थळावरून ८ जणांना रंगेहात पकडून १ लाख ६८ हजार ८६० रूपयाचा मुद्देमाल जप्त करण्यात आला. यातील आरोपीमध्ये अजबलाल दमाहे (३०), सौरभ डहाट (२७), महेश दमाहे (२९), रंजीत कोल्हे, प्रितीलाल डहाट सर्व रा.बरबसपुरा, उमेश लिल्हारे (४८) रा.इर्री, संदिप दमाहे (२७) रा.पांढराबोडी यांचा समावेश आहे. २२ एप्रिल रोजी फुलचूर येथील छन्नीलाल बघेले याला अवैधरित्या दारूविक्री करताना पकडण्यात आले. त्याच्याकडून २ हजार ५०० रूपयाचा मुद्देमाल जप्त करण्यात आला. नागरा येथील चिमन रामकृष्ण नेवारे याला दारू गाळताना पकडण्यात आले. त्याच्याकडून ३९ हजार ६५० रूपयाचा मुद्देमाल जप्त करण्यात आला. असे एकूण पाच कारवाईमध्ये २ लाख ३८ हजार ९१० रूपयाचा मुद्देमाल जप्त करण्यात आला.
No comments:
Post a Comment