थंडीमुळे चौघांचा मृत्यू

लाखांदूर,दि.30ःगेल्या तीन दिवसांपासून सर्वत्र कडाक्याची थंडी पडली आहे. थंडीचे प्रमाण इतके वाढले की, एकाच दिवशी चार जणांचा मृत्यू झाला आहे. सदरची घटना लाखांदूर तालुक्यातील सोनी/संगम येथे शनिवारला (ता.२८) घडली.सुमित्रा जनार्धन दुपारे (७0), ताराबाई प्रितमसिंह पवार (६८) दोन्ही रा. सोनी, इंदीरा दिवाकर हुळे (६७) रा. सरांडी/बुज, तिमा बकाराम मेहंदळे (७0), रा.आसोला अशी मृतकांची नावे आहेत.

संपुर्ण झाडीपट्टीत सोनी या गावात प्रसिद्ध मंडईचे आयोजन केले जात असून, डिसेंबर महिन्याच्या शेवटच्या शनिवारी सोनी या गावात मंडई भरत असते. दरम्यान, या मंडई निमित्ताने गावात पाहुण्यांची रेलचेल असते. मात्र पाहुणे म्हणूनच गेलेल्या चौघांचा मृत्यू झाल्याने सोनी गावात शोककळा पसरली आहे. मृतकांमधील इंदिराबाई दिवाकर हुळे ह्या मुळच्या सरांडी/बुज येथील रहीवाशी असून, त्या एक वर्षापासुन मुलीकडे राहत होत्या. दुसरे मृतक तिमा बकाराम मेहंदळे मु.आसोला हे मंडईकरीता सासर गाव सोनी येथे आले होते. तर सुमित्रा जनार्धन दुपारे व ताराबाई प्रितमसिंह पवार वय (६८) दोन्ही मु.सोनी येथीलच रहीवाशी होते.

शनिवारी तापमान १0 अंशापर्यंत घसरले होते. त्यातच सकाळपासूनच शीतलहर सुरू होती. या कडाक्याच्या थंडीमुळे चार जणांचा मृत्यू झाला आहे. वाढत्या थंडीमुळे नागरिकांनी विशेष खबरदारी घेण्याची गरज आहे.