गुरूद्वारा बोर्डाची लवकरच निवडणूक; मुख्यमंत्र्यांचे आ.तारासिंघ यांना आश्वासन

नरेश तुप्तेवार

नांदेड,दि.28-ः गुरूद्वारा बोर्डाच्या रिक्त झालेल्या तिन सदस्यांची निवडणूक घेण्याचे मुख्यमंत्र्यांनी मान्य केले असुन याबाबत ची अधिसूचना विनाविलंब काढण्याची कार्यवाही सुरू असल्याचे गुरूद्वारा बोर्डाचे अध्यक्ष आ.सरदार तारासिंघ यांनी सांगितले.गुरूद्वारा बोर्डाच्या रिक्त झालेल्या तिन सदस्यांची निवडणूक घेण्यात यावी यासाठी सरदार इंदरसिंघ गल्लिवाले यांच्या नेतृत्वाखाली शिख समाजातील जेष्ठ कार्यकर्त्यांनी उपोषण केले होते. जिल्हाधिकारी यांच्या मध्यस्थीने उपोषण सोडवण्यात आले होते. शासनाकडून निवडणूक घेण्याचे आदेश न आल्याने आंदोलन कर्ते चिडले व त्यांनी 2 जुलै रोजी मंत्रालयासमोर आत्मदहन करण्याचा इशारा दिला. याची गंभीर दखल घेत शासनाकडून काल जोरदार हालचाली सुरु करण्यात आल्या. आ.सरदार तारासिंघ यांनी मुख्यमंत्री श्री फडवणीस यांची भेट घेऊन निवडणूक अधिसूचना काढण्याची मागणी करत त्यावर त्यांचे हस्ताक्षर घेऊन हा विषय मार्गी लावला. यास आ.तारासिंघ यांनी दुजोरा देत विनाविलंब अध्यादेश निघेल असे सांगितले. त्यामुळे गुरूद्वारा बोर्डाच्या रिक्त झालेल्या तिन सदस्यांची निवडणूक घेण्याचे मार्ग मोकळे झाले आहेत असे तारासिंघ म्हणाले.