नगराध्यक्षपदाच्या उमेदवाराचा अपघाती मृत्यू नव्हे हत्याच; पत्नीचा आरोप

अर्जुनी मोरगाव,दि.21(संतोष रोकडे)ः-येथील नगर पंचायतीचे नगरसेवक माणिक मसराम यांचा रविवारी रात्री त्यांच्याच शेताजवळ अपघाती मृत्यू झाल्याची घटना आज सकाळच्या सुमारास उघडकीस आली. याप्रकरणी कुटुंबीयांनी हा अपघात नसून घातपात असल्याचा आरोप केला आहे.माणिक मसराम हे अर्जुनी मोरगाव नगर पंचायतीचे भारतीय जनता पक्षाचे नगरसेवक आहेत. उद्या होणाऱ्या अडीच वर्षाच्या नगराध्यक्षपदाच्या निवडणुकीकरता आज नामांकन दाखल करणार होते. मात्र, रविवारी रात्री त्यांच्या शेताजवळ दुचाकीचा अपघात झाला. त्यात त्यांचा मृत्यू झाला, मात्र, हा अपघात नसून राजकीय वैमनस्यातून त्यांचा अपघात घडवून हत्या केल्याचा आरोप कुटुंबीयांनी अर्जुनी मोरगाव पोलीसात दिलेल्या तक्रारीत  केला आहे. सूत्रांकडून मिळालेल्या माहितीनुसार, मसराम यांचा मृतदेह रात्रभर रस्त्याच्या कडेला पडला होता. आज सकाळी रस्त्यावर जाणाऱ्या लोकांना त्यांचा मृतदेह आढळून आला. त्यानंतर याची माहिती अर्जुनी मोरगाव पोलिसांना देण्यात आली. पोलिसांनी घटनास्थळ गाठत मृतदेह ताब्यात घेत उत्तरीयतपासणीकरीता पाठविले आहे. 

दरम्यान माणिक मसराम यांच्या पत्नी मनिषा मसराम यांनी अर्जुनी मोरगाव पोलीसात तक्रार दाखल करीत आपल्या पतीला देवेंद्र टेंभरे नगरसेवक यांनी आपल्या चारचाकी वाहनात बसवून लाखांदूरला नेले आणि त्यांची हत्या केल्याचा आरोप केला आहे.टेंभरे गेल्या सातआठ दिवसापासून सातत्याने आपल्या पतीला फोन करुन त्रास द्यायचे कारण गैरअर्जदार देवेंद्र टेंभरे हे सुध्दा नगरपरिषद अध्य़क्षपदाचे दावेदार होते.त्यांनी 20मे रोजी कटकारस्थान रचून आपल्या पतीला दारुपाजून ठार केल्याचा आरोप केला आहे.सोबतच त्यांच्यासोबत असणारे एस.कुमार शहारे,माणिक घनाडे,उमाकांत ढेंगे,विजय कापगते यांचीही सखोल चौकशी करण्यात यावी व गैरअर्जदाराला जोपर्यंत अटक होणार नाही,तोपर्यंत मी मृतदेह ताब्यात घेणार नसल्याची लेखी तक्रार दिल्याने तणावाची स्थिती निर्माण झाली आहे.