जिल्हा परिषद निवडणुकांवर नक्षली दहशतीचे सावट

गडचिरोली, दि.१४: मुख्यमंत्री देवेंद्र फडणवीस जिल्ह्यात असताना सिरोंचा तालुक्यातील झिंगानूर येथे नक्षल्यांनी बॅनर व पत्रकांद्वारे जिल्हा परिषद निवडणुकीवर बहिष्कार घालण्याचे आवाहन केल्याने खळबळ माजली आहे.जिल्ह्यात गडचिरोली, धानोरा, मुलचेरा, चामोर्शी, आरमोरी, कुरखेडा, देसाईगंज व कोरची या आठ तालुक्यांमध्ये १६ फेब्रुवारीला, तर भामरागड, एटापल्ली, अहेरी व सिरोंचा तालुक्यात २१ फेब्रुवारीला जिल्हा परिषदेची निवडणूक होणार आहे. पहिल्या टप्प्यातील निवडणुकीतील भाजप उमेदवारांच्या प्रचारासाठी आज मुख्यमंत्री देवेंद्र फडणवीस यांची चामोर्शी येथे जाहीर सभा आयोजित करण्यात आली होती. मात्र याच दिवशी भल्या सकाळी सिरोंचा तालुक्यातील झिंगानूर येथे तीन ते चार ठिकाणी नक्षल्यांनी कापडी बॅनर लावल्याचे आढळून आले. अनेक ठिकाणी त्यांनी पत्रकेही टाकली होती. पोलिसांनी हे बॅनर व पत्रके ताब्यात घेतली.