नवी दिल्ली,दि.15 (वृत्तसंस्था)- नागरिकांना आता एका क्लिकवरुन पॅन कार्ड आणि आधार कार्डात झालेल्या चुका दुरुस्त करता येणार आहेत. प्राप्तिकर विभागाने पॅन आणि आधार कार्डावरील नाव किंवा इतर तपशीलात बदल करण्यासाठी ऑनलाईन सुविधा उपलब्ध करुन दिली आहे.
याअंतर्गत प्राप्तिकर विभागाने वेबसाईटवर दोन लिंक उपलब्ध करुन दिल्या आहेत. पहिल्या लिंकवर क्लिक करुन पॅन कार्डातील चुका दुरुस्त होतील. तसेच या लिंकवरुन नव्या पॅन कार्डसाठीदेखील अर्ज करता येणार आहे. आधार कार्डावरील तपशीलात बदल करण्यासाठी दुसरी स्वतंत्र लिंक उपलब्ध करुन देण्यात आली आहे. प्राप्तिकर विभागाने गेल्या आठवड्यात नागरिकांची पॅन कार्ड आणि आधार कार्ड जोडणीची प्रक्रिया सुलभ करण्यासाठी ऑनलाईन सुविधा उपलब्ध करुन दिली होती.
आतापर्यंत देशातील सुमारे 1.22 कोटी करदात्यांनी आपले आधार कार्ड आणि पॅन कार्ड एकमेकांना जोडले आहे. परंतु, देशात आधारकार्डधारकांची संख्या तब्बल 111 कोटी असून पॅनकार्डधारकांची 25 कोटीएवढी आहे. यामुळे सर्व नागरिकांनी लवकरात लवकर ही प्रक्रिया पुर्ण करण्याचे आवाहन केले जात आहे.
देशातील सर्व नागरिकांना येत्या 1 जुलैपर्यंत पॅन कार्ड म्हणजेच परमनंट अकाऊंट नंबर आपल्या आधार कार्डासोबत जोडण्याचे आदेश देण्यात आले आहेत. असे न करणाऱ्या नागरिकांचे पॅन कार्ड रद्द केले जाणार असून ते कोणत्याही आर्थिक व्यवहारासाठी अपात्र असेल असेही सरकारने स्पष्ट केले आहे. देशातील प्राप्तिकर संकलन वाढवण्यासाठी आणि करचुकवेगिरी करणार्‍या लोकांवर लगाम लावण्यासाठी सरकारने हे आदेश दिले आहेत.
No comments:
Post a Comment