नोटाबंदीनंतर देशभरात ९१ लाख नवे करदाते वाढले

नवी दिल्ली,दि.17: केंद्रीय वित्तमंत्री अरुण जेटली यांनी मंगळवारी पुन्हा एकदा सरकारने घेतलेल्या नोटबंदीच्या निर्णयाची पाठराखण केली. या निर्णयामुळे ९१ लाख लोक नव्याने कराच्या कक्षेत आल्याचा दावा जेटली यांनी केला. काळ्या पैशाविरोधात मोहीम तीव्र करण्यासाठी केंद्र सरकारने 'ऑपरेशन क्लिन मनी' ही नवीन वेबसाईट तयार केली आहे. या वेबसाईटचे अनावरण जेटली यांच्या हस्ते झाले. त्याप्रसंगी ते बोलत होते. केंद्र सरकारने ८ नोव्हेंबर २0१६ रोजी ५00 आणि १ हजार रुपयांच्या जुन्या नोटा रद्द करण्याचा धाडसी निर्णय घेतला. या निर्णयानंतर डिजिटायझेशनचा वेग मोठय़ा प्रमाणात वाढला. व्यवहारात पारदर्शकता आणण्यासाठी हे अत्यंत आवश्यक होते. रोखीचे व्यवहार कमी झाले. जास्तीत जास्त लोक कारवाईच्या भीतीने कराच्या कक्षेत आले. त्यामुळे सरकारच्या तिजोरीत कररूपाने जमा होणार्‍या महसुलात वाढ झाली. सुमारे ९१ लाख नवे करदाते या निर्णयानंतर तयार झाले. आयकर भरणार्‍यांच्या संख्येतही वाढ झाली. एकूणच नोटाबंदी आणि काळ्या पैशांच्या विरोधात सरकारने छेडलेल्या व्यापक मोहिमेमुळे मोठे व्यवहार रोखीने करून कर चुकवेगिरी करणार्‍यांना आता आपली काही खैर नाही, हे कळून चुकले, असे जेटली याप्रसंगी म्हणाले. 'ऑपरेशन क्लिन मनी' या वेबसाईटमुळे काळ्या पैशाच्या विरोधातील लढाई अधिक तीव्र होईल. मात्र प्रामाणिक करदात्यांना याचा फायदा होईल, असेही जेटली पुढे म्हणाले.