नायब तहसीलदार संजय राठोड एसीबीच्या जाळ्यात

ब्रम्हपुरी,दि.२२ः- अर्‍हेरनवरगांव घाट जवळ ट्रक्टरव्दारे रेतीची वाहतूक करीत असतांना नायब तहसीलदार संजय राठोड (३३) यांनी रेती वाहतुकीची ही वेळ योग्य नसल्याचे सांगून तक्रारकर्त्याला ट्रॅक्टरवर गुन्हा दाखल करण्याची धमकी दिली. या मोबदल्यात १७ हजार रूपयाची मागणी केली. तक्रार कर्त्यांनी ही बाब लाच लुचपत विभागाला सांगितली. त्यांनी त्वरीत कार्यवाही करत नायब तहसीलदार राठोड याला आज बुधवार २१ फेब्रुवारी रोजी १५ हजार रूपयाची लाच स्वीकारतांना रंगेहाथ पकडले.
तालुक्यातील अर्‍हेरनवरगाव येथील तक्रार कर्ता हा शेतकरी असून एका ट्रॅक्टरचा मालकही आहे. तो अर्‍हेरनवरगाव रेती घाटावर ट्रॅक्टरव्दारे रेतीची वाहतुक करतो. नायब तहसीलदार राठोड यांनी ट्रॅक्टरव्दारे रेती वाहतूक करीत असतांना सदर वेळ ही रेती वाहतूकीची नसल्याचे कारण सांगुन तक्रार कर्त्यावर दबाव आणला. परंतु तक्रार कर्त्यांने वाहतुक परवानांची ही वेळ बरोबर असल्याचे नमुद असल्याचे सांगितले. त्यानंतर नायब तहसीलदार संजय राठोड यांनी ट्रॅक्टरवर गुन्हा दाखल करण्याची धमकी देत तुला महिनाभर रेती वाहतुक करायची असेल व ट्रॅक्टरवर कोणत्याही प्रकारची कारवाईहोवू नये असे वाटत असेल तर १७ हजार रूपये देण्याची मागणी केली. तक्रार कर्त्याला सदर रक्कम द्यावयाची नसल्यामुळे त्यांने ही बाब लाचलुचपत प्रतिबंधक विभाग गडचिरोली येथे २0 फेब्रुवारी रोजी तक्रारी व्दारे सांगितली. आरोपी नायब तहसीलदार संजय राठोड विरोधात तक्रार दाखल झाल्याने अधिकारी व कर्मचार्‍यांनी ब्रम्हपुरी शहरातील तहसील कार्यालय परिसरात सापळा रचला. आरोप राठोड यांने तक्रारदाराकडून महिनाभर रेती वाहतुक चालु रहावी याकरीता व कोणतीही कारवाई होवू नये यासाठी १७ हजार रूपयाची मागणी केली होती. याबदल्यात आज २१ फेब्रुवारी रोजी तक्रार दाराने नायब तहसीलदार राठोड याला १५ हजार रूपयाची रक्कम दिली. ही रक्कम देत असतांना लाचलुचपत विभागाच्या अधिकार्‍यांनी आरोप संजय राठोड याला पैसे स्विकारतांना रंगे हाथ पकडले. व आरोपीवर कलम ७,१३(१)(ड) सह १३(२) लाचलुचपत प्रतिबंधक कायदा सन १९८८ अन्वये गुन्हा नोंदविला.
सदर कारवाई पोलिस उपायुक्त पी.आर.पाटील,(नागपूर )अप्पर पोलिस अधिक्षक विजय माहुलकर,पोलिस उपअधिक्षक रोशन यादव,डी.एम. घुगे यांच्या मार्गदर्शनाखाली पोलिस निरीक्षक एम.एस. टेकाम,पोलिस हवालदार विठोबा साखरे,सत्यम लोहबरे,रविंद्र कात्रोजवार, महेश कुकडकार, गणेश वासेकर, घनश्याम वडेट्टीवार यांनी बजावली.