जेएसव्ही डेव्हलपर्स कंपनीच्या मुख्यसूत्रधारास अटक

भंडारा दि.१३ःजेएसव्ही डेव्हलपर्स व जयविनायक नावाची कंपनी सुरू करून गुंतवणुकदारांची कोट्यवधी रुपयांची फसवणूक करणारा मुख्य सूत्रधार जगमोहनसिंह कठैत याला छत्तीसगढ राज्यातील डोंगरगढ येथून नियोजित पध्दतीने अटक करण्यात आली. जगमोहनसिंग कठैत याने जेएसव्ही डेव्हलपर्स नावाची कंपनी स्थापन करून महाराष्ट्र, मध्यप्रदेश, छत्तीसगढ राज्यातील लोकांना दामदुप्पट करून देण्याचे प्रलोभन देऊन गेल्या दोन वर्षापासून पोलिसांना व कार्यकर्त्यांना मुर्ख बनवत होता.
छत्तीसगढ राज्यातील डोंगरगढ येथे जगमोहनसिंह कठैत, अमित चौधरी हे नवीन कंपनी सुरू करून लोकांना प्रलोभन देऊन आर्थिक फसवणूक करणार आहेत, यासाठी त्यांनी सभेचे आयोजन केले आहे, याबाबतची माहिती तिरोडा व गोंदिया येथील गुंतवणुकदारांनी भंडारा येथील सामाजिक कार्यकर्ता विष्णू लोणारे यांना दिली.
त्यानंतर लोणारे यांनी अपर पोलिस अधीक्षक रश्मी नांदेडकर यांना घटनेची माहिती दिली. नांदेडकर यांनी आर्थिक गुन्हे शाखेचे पोलिस अधिकारी राजेंद्र नागरे यांच्या मार्गदर्शनाखाली टिम तयार केली.त्यानुसार सापळा रचून सहाय्यक पोलिस निरीक्षक गणेश काळे, एस. आय. टिचकुले, माहुर्ले, अशोक लुलेकर, सुधीर शिवणकर आदींनी विष्णूदास लोणारे, कन्हेया नागपूर यांना सोबत घेऊन डोंगरगढ येथे गेले. तिथे नियोजनबद्ध जगमोहनसिंग कठैत याला अटक करण्यात आली.