चिचेवाडा ग्रामसभेची सक्षमतेकडे वाटचाल

कुरखेडा, दि.18- तालुक्यातील चिचेवाडा येथे 'दिल्ली, मुंबईत आमचे सरकार-आमच्या गावात आम्ही सरकार' या घोषवाक्याप्रमाणे आम्ही आमच्या आरोग्यासाठी व ग्रामसभा चिचेवाडा यांच्या संयुक्त विद्यमाने ग्रामसभा सक्षमीकरण कार्यक्रमाचे आयोजन करण्यात आले होते. कार्यक्रमाच्या अध्यक्षस्थानी अजय मडावी होते. यावेळी कोरची महाग्रामसभेचे सल्लागार इजामसाय काटेंगे, तालुका कृषी अधिकारी रामटेके, कृषी सहाय्यक क्षिरसागर, आम्ही आमच्या आरोग्यासाठीच्या प्रतिमा नंदेश्‍वर उपस्थित होते.अध्यक्षस्थानावरून मार्गदर्शन करताना अजय मडावी यांनी गावाच्या विकासासाठी व ग्रामसभा सक्षम होण्याच्या दृष्टीने ग्रामसभेची भूमिका काय असावी, याबद्दल माहिती दिली. इजामसाय काटेंगे यांनी 'आपण आपला मार्ग शोधू' या म्हणीप्रमाणे वनाचे व्यवस्थापन, जल जमीन, जंगलाच्या संसाधनावरील अधिकार व मालकी हक्क २00६ च्या वनहक्क अधिनियमांतर्गत चिचेवाडा ग्रामसभेला ३६३ हे.आर. क्षेत्र जंगलाचे अधिकार अभिलेख जोडपत्र मिळालेले आहे. या अधिकाराचा वापर करून ग्रामसभेने जंगलावरचे अधिकार प्राप्त केले आहेत. ग्रामसभा वनाचे संरक्षण संवर्धन व व्यवस्थापन करीत आहे. तसेच निस्तार हक्क, पेसा कायदा, २00६ वनहक्क कायदा, माहितीचा अधिकार अशा कायद्याचा अभ्यास व वापर करून ग्रामसभा सक्षमतेच्या दिशेने वाटचाल करू शकते, असे प्रतिपादन त्यांनी केले.प्रमुख अतिथी म्हणून तालुका कृषी अधिकारी रामटेके यांनी आपल्या भाषणातून सेंद्रिय शेतीचे महत्व पटवून दिले. सेंद्रिय शेती, रासायनिक शेती मधील फरक सांगितला. तसेच कृषी विभागामार्फत विविध योजनाची माहिती दिली. फळबाग, बांधावर झाडे, तुषार, ठिंबक सिंचन, मागेल त्याला शेततळे, जैविक खते, कीड नियंत्रण, अशा विविध विषयावर मार्गदर्शन करून शेतकर्‍यांचे प्रबोधन केले. संचालन मनोज चव्हान तर प्रास्ताविक प्रेमलाल किरनापुरे यांनी केले. आभार देवाजी वटी यांनी मानले. कार्यक्रमाच्या यशस्वीतेसाठी गावातील महिला, पुरूष व युवकांनी सहकार्य केले.