गडचिरोली, दि.१९: पती बाहेर गेल्याची संधी साधून एका महिलेवर अतिप्रसंग करण्याच्या प्रयत्नात तिच्या चिमुकल्या मुलाची धारदार शस्त्राने हत्याने केल्याची घटना आज भल्या पहाटे मुलचेरा तालुक्यातील लगामनजीकच्या कांचनपूर येथे घडली. मुलाची आई गंभीर जखमी असून, आरोपी संजू विश्वनाथ सरकार(२०) फरार आहे.
प्राथमिक माहितीनुसार, पीडित महिलेचा पती हैद्राबाद येथे गेला होता. त्यामुळे ती आपल्या साहिल नामक ४ वर्षीय चिमुकल्यासह घरी झोपली होती. मध्यरात्री तिच्या घराशेजारी राहणारा संजू विश्वनाथ सरकार याने घरी जाऊन तिच्यावर अतिप्रसंग करण्याचा प्रयत्न केला. तिने आरडाओरड करताच त्याने तिच्यावर धारदार शस्त्राने वार केले. यामुळे ती गंभीर जखमी झाली. आवाजामुळे ४ वर्षीय बालक जागा होऊन रडायला लागला. त्यामुळे आरोपीने त्याची हत्या केली. सकाळ होऊनही पीडित महिलेच्या घरचे कोणीच बाहेर न आल्याने आजूबाजूच्या नागरिकांनी घरात डोकावून पाहिले असता महिला रक्ताच्या थारोळ्यात बेशुद्धावस्थेत दिसून आली. नागरिकांनी पाणी पाजल्यानंतर काही वेळाने ती बोलायला लागली. तिने आपबिती सांगून संजू सरकार याने हे कृत्य केल्याचे सांगितले. त्यानंतर नागरिकांनी जंगलात फरार झालेल्या आरोपी संजू सरकार यास पकडून आणून चांगलाच चोप दिला. पोलिस घटनास्थळी पोहचताच नागरिकांनी आरोपीस त्यांच्या स्वाधीन केले. जखमी महिलेस अहेरी येथील उपजिल्हा रुग्णालयात भरती करण्यात आले असून, तिची प्रकृती स्थिर असल्याचे सांगण्यात येत आहे. उपविभागीय पोलिस अधिकारी गजानन टोम्पे घटनेचा तपास करीत आहेत.
No comments:
Post a Comment