सुरजागड पहाडावरील जाळपोळ प्रकरणी वरवरा रावसह सुरेंद्र गडलिंगला 11 दिवसांची पोलीस कोठडी

गडचिरोली,दि.01 – भीमा-कोरेगाव प्रकरणात पुणे पोलिसांच्या ताब्यात असलेल्या प्रा. वरवरा राव आणि एड सुरेंद्र गडलिंग या दोघांना नक्षल्यांसोबत संबंध  तसेच २३ डिसेंबर २०१६ रोजी एटापल्ली तालुक्यातील सुरजागड लोह खनिज टेकड्यांवर ८० मालवाहतूक ट्रक जाळपोळप्रकरणात सहभागी असल्याच्या आरोपावरुन गुन्हे नोंदविण्यात आले आहेत.त्या दोघांना गुरुवारी गडचिरोली पोलिसांनी ताब्यात घेत अहेरी न्यायालयात हजर केले असता न्यायालयाने 11 दिवसाची पोलीस कोठडी दिली आहे.

या दोघांनाही गडचिरोली पोलिसांनी १४ दिवस पोलीस कोठडी मागितली होती. मात्र, न्यायालयाने ११ दिवसांची कोठडी दिली आहे. राव-गडलिंग यांच्या वकिलांनी मात्र पुणे पोलिसांची विश्रामबाग पोलीस ठाण्यात दाखल मूळ एफआयआर रद्द करून अटकेतील सर्वांना सर्वोच्च न्यायालयात जामीन मिळणे जवळपास निश्चित झाल्याने त्यांना अन्य गुन्ह्यात अडकविण्याचा पोलिसांचा प्रयत्न असल्याचे म्हटले आहे. गडचिरोली पोलिसांचा एफआयआर रद्द व्हावा आणि दोघांना जामीन मिळावी यासाठी आम्ही प्रयत्न करणार असल्याचे त्यांनी सांगितले.उपविभागीय पोलिस अधिकारी शशिकांत भोसले हे या प्रकरणाचा तपास करणार आहेत. यापूर्वी साईबाबाला अहेरी पोलिसांनी दिल्लीवरून अटक केली होती. आता तर पहिल्यांदाच या चळवळीचे कट्टरसमर्थक असलेल्या वरवरा रावला पोलिसांनी अटक केली आहे.