घाटकोपरमध्ये चार मजली इमारत कोसळली

मुंबई,दि.25-घाटकोपरच्या दामोदर पार्क येथे श्रेयस सिनेमाजवळ चार मजली इमारत कोसळली आहे. अग्निशमन दल घटनास्थळी दाखल झाले आहे. आतापर्यंत ढिगाऱ्याखाली अडकलेल्या 9 जणांना बाहेर काढण्यात आले आहे. या इमारतीच्या ठिगाऱ्याखाली 30 ते 40 जण अडकल्याची शक्यता व्यक्त करण्यात येत आहे. एनडीआरएफची टीमही घटनास्थळाकडे रवाना झाली आहे.

सकाळी 10 वाजून 45 मिनिटांनी ही इमारत कोसळली. ही इमारत 40 वर्ष जुनी असल्याचे सांगण्यात येत आहे. या इमारतीच्या तळ मजल्यावर सितप नर्सिग होम होते. इमारतीच्या वरच्या मजल्यावर काही कुटंब राहत होती. तळ मजल्यावर असणाऱ्या नर्सिग होमचे नुतनीकरण सुरू होते. इमारतीमध्ये 15 कुटुंब वास्तव्यास होती. तातडीच्या वैद्यकीय मदतीसाठी 8 अॅम्ब्युलन्स घटनास्थळी तैनात करण्यात आल्या आहेत. ढिगाऱ्याखालून सुखरुप बाहेर काढलेल्या नागरिकांना उपचारांसाठी राजावाडी रुग्णालयात दाखल करण्यात आले आहे.