महू (मध्य प्रदेश),दि.9-भारिप बहुजन महासंघाचे नेते प्रकाश आंबेडकर यांच्या गाडीवर मध्य प्रदेशातील महू येथे भाजपच्या कार्यकर्त्यांनी हल्ला करण्याचा प्रयत्न केला. प्रकाश आंबेडकर यांचे भाऊ भीमराव आंबेडकर यांनी या वृत्ताला दुजोरा दिला आहे. सोशल मीडियावर आज सकाळपासून या घटनेचा तीव्र शब्दांत निषेध नोंदवण्यात येत आहे.
महू येथील 'जनवेदना किसान सम्मेलना'त सहभागी झाल्यानंतर प्रकाश आंबेडकर यांच्या हस्ते महू येथील विज्ञान विद्यापीठात डॉ. बाबासाहेब आंबेडकर व तथागत गौतम बुद्ध यांच्या प्रतिमेचे अनावरण करण्यात आले. हा कार्यक्रम आटोपल्यानंतर प्रकाश आंबेडकर विद्यापीठाच्या बाहेर पडणार तितक्यात भाजपच्या काही लोकांनी त्यांची गाडी अडवली व त्यांना काळे झेंडे दाखवले. भाजप कार्यकर्त्यांनी प्रकाश आंबेडकरांच्या गाडीला घेराव घातला त्यावेळी तेथे पोलिस हजर नव्हते. प्रकाश आंबेडकरांची गाडी भाजपच्या कार्यकर्त्यांनी अडवली त्यावेळी त्यांच्या गाडीच्या मागे काँग्रेसचे महासचिव मोहन प्रकाश व मध्य प्रदेश काँग्रेसचे अध्यक्ष अरुण यादव हे दुसऱ्या गाडीत बसलेले होते.
मध्य प्रदेशात प्रकाश आंबेडकरांची गाडी अडवली व त्यांच्यावर हल्ल्याचा प्रयत्न केला, अशी बातमी पसरताच त्याचे पडसाद महाराष्ट्रात उमटले असून अनेकांनी सोशल मीडियातून या घटनेचा निषेद नोंदवला आहे. दरम्यान, प्रकाश आंबेडकर यांचे छोटे बंधू भीमराव आंबेडकर यांच्याशी संपर्क साधला असता त्यांनी या वृत्ताला दुजोरा दिला आहे. भाजपच्या कार्यकर्त्यांनी काळे झेंडे दाखवले व गाडी अडवण्याचा प्रयत्न केल्याचे ते म्हणाले.दरम्यान, भारतीय घटनेचे शिल्पकार डॉ. बाबासाहेब आंबेडकर यांचा जन्म महू येथे झाला असून प्रकाश आंबेडकर हे त्यांचे नातू आहेत.
No comments:
Post a Comment