कंत्राटदारांनी काढली प्रधान सचिवाची गाढवावरुन धिंड

यवतमाळ,दि.10 -येथील सार्वजनिक बांधकाम विभागात कंत्राटदारांकडून शासन विरोधात अनोखे आंदोलन करण्यात आले. या आंदोलनात बांधकाम विभागाच्या प्रधान सचिवाच्या नावाच्या फलकाची गाढवावरून धिंड काढण्यात आली.यवतमाळ जिल्ह्यातील कंत्राटदारांचे शासनाकडे १०० कोटीची देयके प्रलंबित आहेत. त्यामुळे कंत्राटदारांची दिवाळी अंधारात असून या प्रलंबित देयकेबाबत सरकारने निर्णय न घेतल्याने जिल्ह्यात कंत्राटदारांनी काम बंद आंदोलन पुकारले आहे. जिल्ह्यात टेंडर न भरण्याचे आंदोलन सुरू असून या बाबत आज कंत्राटदारांनी अनोखे आंदोलन केले. आपल्या कामाचे ट्रक, जेसीबी, मशनरी आणि आपली सर्व मालमत्ता साहित्य घेऊन सरकारला स्वाधीन करण्यात आली. तर सार्वजनिक बांधकाम विभागाचे सचिव आशिष सिंग यांच्या कडून बैठकित कंत्राटदारांना अपमानास्पद वागणूक मिळाल्याने त्यांचा नावाचा फलक गाढवावर ठेवून धिंड काढण्यात आली.