नागपूर,दि.24 - गेल्या महिनाभरापासून शहरातील विविध भागात हत्यासत्र सुरू झाले असून नागरिकांमध्ये दहशतीचे वातावरण आहे. गेल्य २१ नोव्हेंबरला राहुल आग्रेकर या युवकाचे लकडगंज भागातून अपहरण करून त्याची हत्या करण्यात आली. असे असताना पुन्हा काल गुरुवारी पुन्हा ८ तासात दोघांच्या हत्या झाल्याने पोलिसातही खळबळ उडाली आहे.
गुरुवारी सकाळी दिनेश धरमसिंग उईके (वय ३०, रा. दाते ले-आऊट) आणि दिनेश अशोक कोटांगळे (वय २५, रा. पन्नासे ले-आऊट) हे दोघे प्रतापनगरातील मजुरांच्या ठिय्यावर उभे होते. काम न मिळाल्याने ते सोबतच दारू प्यायला गेले. त्यानंतर दुपारी २ च्या सुमारास मेंढे ले-आउटमधील रचना अपार्टमेंटजवळ त्यांच्यात वाद सुरू झाला. उईकेने कोटांगळेच्या पत्नीला उद्देशून शिवीगाळ केली. त्यामुळे चिडलेल्या कोटांगळेने उईकेच्या डोक्यावर दगडाने ठेचून त्याची हत्या केली. त्यानंतर पळून गेला. माहिती कळताच सोनेगाव पोलीस घटनास्थळी पोहचले. त्यांनी शोधाशोध करून आरोपीला अटक केली.
दुसरी घटना रात्री १० च्या सुमारास खलासी लाईन, सदरमध्ये घडली. आरोपी प्रवीण चरणदास हुमणे आणि मृत अविनाश अरविंद मेहरा (वय ३३) हे दोघे साळे-भाटवे होत. ते मिलिंद तायवाडेच्या घरी भाड्याने राहत होते. मृत मेहराला दारूचे व्यसन होते. तो घरी आल्यानंतर पत्नीला बेदम मारहाण करायचा. गुरुवारी रात्री असेच झाले. मेहरा दारूच्या नशेत आला आणि त्याने पत्नीला बेदम मारहाण करायला सुरुवात केली. तिचे दोन आठवड्यांपूर्वीच आॅपरेशन झाले आहे. ती वेदनांनी तडफडत भावाच्या घरी गेली. तिच्या मागेच मेहरा आला. ते पाहून त्याचा साळा प्रवीण याने बाजूची काठी उचलून मेहराच्या डोक्यावर मारली. एकाच फटक्यात मेहरा खाली पडला आणि गतप्राण झाला. आरडाओरड ऐकून बाजूची मंडळी धावली. त्यांनी सदर पोलिसांना माहिती दिली. पोलिसांनी घटनास्थळी धाव घेत पळून जाण्याच्या तयारीतील आरोपी प्रवीणला अटक केली.
No comments:
Post a Comment