गोंदिया/भंडारा,दि.24ः-जिल्हा पणन अधिकारी भंडारा यांच्यामार्फत धान खरेदी सुरू होणार असून , जिल्हा पणन अधिकारी यांनी प्रस्तावित केल्याप्रमाणे जिल्ह्यात ६७ धान खरेदी केंद्रांना जिल्हाधिकारी एम. जे. प्रदीप चंद्रन यांनी मंजुरी प्रदान केली आहे. आधारभूत खरेदीचा दर ‘अ’ प्रतीचे धान प्रती क्विंटल १८३५ रुपये व साधारण दर्जाचे धान प्रती क्विंटल १८१५ रुपये या प्रमाणे आहे.
शेतकर्‍यांनी खरेदी केंद्रावर धान विक्रीकरीता आणतांना स्वत:चे आधारकार्ड, बँक क्रमांक व ज्यावर धान पिकाची नोंद आहे. असा शेताचा चालु वर्षाचा सातबारा सोबत आणणे अनिवार्य आहे. तसेच १0 ऑक्टोबर २0१९ च्या शासन पत्रानुसार दिलेले विहित विनिर्देश, तालुकानिहाय खरेदी केंद्राची नावे व त्या केंद्रांना जोडलेली गावे याबाबत सविस्तर माहिती जिल्हा पणन अधिकारी भंडारा यांच्याकडून प्राप्त होईल. धान उत्पादक शेतकर्‍यांना काही अडचणी भासल्यास जिल्हा पणन अधिकारी एस. डब्ल्यु. हजारे यांच्याशी संपर्क साधावा, असे कळविण्यात आले आहे.
गोंदिया जिल्ह्यात ६२ हमीभाव धान खरेदी केंद्र कार्यान्वित करण्यासाठी जिल्हाधिकार्‍यांना प्रस्ताव पाठवून मंजुरी मागितली होती. मात्र विधानसभा निडणुकीच्या प्रक्रियेत प्रशासकीय यंत्रणा गुंतल्याने अद्यापही जिल्ह्यात धान खरेदी केंद्र सुरू झालेले नाहीत. आता पाच दिवसावर दिवाळी आलेली आहे. धानच विकले गेले नाही तर दिवाळी कशी साजरी करायची, असा प्रश्न शेतकर्‍यांसमोर उभा आहे. त्यामुळे तातडीने धान खरेदी केंद्र सुरू करण्याची मागणी होत आहे. यासंदर्भात जिल्हा पणन अधिकारी जी.टी. खर्चे यांच्याशी संपर्क साधण्याचा प्रयत्न केला असता संपर्क होवू शकला नाही.
जिल्ह्यातील अनेक शेतकर्‍यांनी दिवाळी साजरी करण्यासाठी हलक्या धानाची कापणी व मळणी करून ते विक्रीकरिता शेतातील बांध्यात ठेवले असून धान खरेदी केंद्र सुरू होण्याची प्रतिक्षेत होते. अशात पद्धतीच्या पावसाने गत चाद्द दिवसापासून तळ ठोकला असल्याने शेतातील बांध्यात ठेवलेले व कापणीला आलेल्या धानाचे मोठे नुकसान झाले आहे. तातडीने धान खरेदी केंद्र सुरू न झाल्यास हातात असलेले धान गमावण्याची वेळ शेतकर्‍यांवर येणार असल्याचे चित्र दिसत आहे.
No comments:
Post a Comment