गुजरातमधील राष्ट्रवादीचे एकमेव आमदार अटकेत

अहमदाबाद,दि.21 - गुजरातमधील राष्ट्रवादी काँग्रेसचे एकमेव नवविनर्वाचित आमदार कांधल जडेजा यांना अटक झाली आहे. कांधल जडेजा यांच्यावर पोरबंदर जिल्ह्यात दंगल घडवल्याचा आणि पोलिसांना मारहाण केल्याचा आरोप असून कांधल जडेजा यांच्यासह अन्य सात जणांना अटक करण्यात आली आहे. पोरबंदर जिल्ह्यात मतदानावरुन झालेल्या भांडणानंतर कांधल जडेजा यांनी समर्थकांसोबत पोलिस ठाण्यात जाऊन अधिका-यांना मारहाण करत सरकारी संपत्तीचं नुकसान केले होते, अशी माहिती पोलिस अधीक्षक शोभा यांनी दिली आहे. 

कांधल जडेजा आपले दोन भाऊ करण जडेजा, काना जडेजा आणि डझनभर कार्यकर्त्यांसोबत पोलीस ठाण्यात घुसरले होते. त्यांचा राजकीय शत्रू म्हणून ओळखल्या जाणा-या सम्राट गोगान यांनी हल्ल्याच्या भीतीने पोलिस ठाण्यात आश्रय घेतला होता. कांधल जडेजा समर्थकांसोबत आपल्यावर हल्ला करेल, अशी भीती त्यांना होती. बुधवारी कांधल जडेजा यांनी पोलिस ठाण्यात घुसून त्यांना मारहाण केली होती. 

'आरोपींनी गोगान आणि पोलिस ठाण्यात उपस्थित अधिका-यांना मारहाण केली. यानंतर त्यांनी राडा करत पोलिस ठाण्यातील सामानाची तोडफोड केली', अशी माहिती पोलीस अधिकारी एन डी परमार यांनी दिली. जडेजा आणि त्यांच्या साथीदारांना अटक करण्यात आली आहे. गुजरात विधानसभा निवडणुकीत कांधल जडेजा यांनी भाजपाच्या उमेदवाराचा 23 हजार मतांनी पराभव करत निवडणूक जिंकली होती. विशेष म्हणजे राष्ट्रवादीचे ते एकमेव विजयी उमेदवार आहेत.