पाटणा,(वृत्तसंस्था)- ‘बिहारमधील महाआघाडी संपुष्टात आल्याने मी फार दु:खी आहे. आगामी लोकसभा निवडणुकीत भाजपच्या नेतृत्वाखालील राष्ट्रीय लोकशाही आघाडीचा (एनडीए) पराभव करण्यासाठी देशपातळीवर ‘महाआघाडी’ उघडण्यात येईल,’ असा इशारा संयुक्त जनता दलाचे (जेडीयू) बंडखोर नेते शरद यादव यांनी रविवारी दिला. ‘तुम्ही सत्तेसाठी बिहारमधील ‘महाआघाडी’ तोडून जनतेशी गद्दारी केलीत. मतदारांनी जो जनादेश दिला होता तो नाकारून विश्वासघात केलात. आता तुम्हाला राष्ट्रीय पातळीवरील ‘महाआघाडी’तून उत्तर देऊ,’ असा टोला शरद यादव यांनी बिहारचे मुख्यमंत्री नितीशकुमार यांचे नाव न घेता लगावला.राष्ट्रीय जनता दलप्रमुख व बिहारचे माजी मुख्यमंत्री लालूप्रसाद यादव यांनी पाटण्यातील ऐतिहासिक गांधी मैदानात आयोजित केलेल्या ‘देश बचाओ, बीजेपी भगाओ’ या महारॅलीत एकत्रित आलेल्या विरोधी पक्षांनी आपली ताकद दाखवून दिली. भाजपविरोधात लालूप्रसाद यांनी दिलेल्या हाकेला साद देऊन शरद यादव यांच्यासह तृणमूल काँग्रेसच्या सर्वेसर्वा व पश्चिम बंगालच्या मुख्यमंत्री ममता बॅनर्जी, उत्तर प्रदेशचे माजी मुख्यमंत्री व समाजवादी पक्षाचे नेते अखिलेश यादव, काँग्रेसचे ज्येष्ठ नेते गुलाम नबी आझाद, सी. पी. जोशी, राष्ट्रवादी काँग्रेसचे तारीक अन्वर, राष्ट्रीय लोकदलाचे जयंतसिंह चौधरी, मार्क्सवादी कम्युनिस्ट पक्षाचे सुधाकर रेड्डी, झारखंड मुक्ती मोर्चाचे नेते व माजी मुख्यमंत्री हेमंत सोरेन, झारखंड विकास मोर्चाचे बाबुलाल मरांडी, ‘एआययूडीएफ’चे बद्रुद्दीन अजमल आणि द्रमुक, धर्मनिरपेक्ष जनता दल या पक्षाच्या नेत्यांनी व्यासपीठावर हजेरी लावली; तसेच लालूप्रसाद यांची पत्नी माजी मुख्यमंत्री राबडीदेवी, पुत्र तेजस्वी व तेजप्रताप आणि कन्या खासदार मीसा भारतीही उपस्थित होते.
No comments:
Post a Comment