'मोदीजी, मुलीला जन्म द्यायची भीती वाटते'

मुंबई,17- 'मला मुलगाच व्हावा असा माझा हट्ट नाही. पण मुलीला जन्म द्यायची आता भीती वाटते. स्वर्गातून नरकात का ढकललं असं तिनं विचारलं तर तिला काय उत्तर देऊ?...''असा थेट प्रश्न अभिनेत्री दिव्यांका त्रिपाठी हिनं पंतप्रधान नरेंद्र मोदी यांना केला आहे.
 छोट्या पडद्यावर प्रभावी स्त्रीवादी भूमिका साकारणारी दिव्यांका प्रत्यक्ष आयुष्यातही महिला सक्षमीकरणाच्या कार्यात सक्रिय आहे. स्वातंत्र्यदिनी चंदीगड येथे एका अल्पवयीन मुलीवर झालेल्या बलात्कारामुळं दिव्यांका अस्वस्थ झाली आहे. या अस्वस्थतेतून तिनं पंतप्रधान मोदींना उद्देशून एका मागोमाग एक ट्विट केले आहेत. 'मोदीजी, स्वच्छ भारत' मोहीम राबवताना देशातील बलात्काररूपी कचराही साफ करा... एकवेळ कचऱ्याच्या ढिगाऱ्यांसोबत जगता येईल. पण या लांडग्यांच्या दहशतीखाली जगणं कठीण आहे,' असा संताप तिनं व्यक्त केला आहे.