बेळगाव : रक्षाबंधनदिवशी भावाला राखी आणून बांधण्यासाठी पत्नीने पतीकडे दहा रुपये मागितले. पण, पतीने दहा रुपये देण्यास नकार दिल्यामुळे पत्नीने भावनावश होऊन गळफास घेऊन आत्महत्या केल्याची धक्कादायक घटना बेळगावमध्ये घडली.महादेवी अशोक गोल्लर असे आत्महत्या केलेल्या महिलेचे नाव आहे. अशोक गोल्लर आणि महादेवी यांचा तीन वर्षांपूर्वी त्यांचा प्रेमविवाह झाला आहे. अशोकचा भंगाराचा व्यवसाय होता. विवाहानंतर अशोकला दारूचे व्यसन लागले आणि वाद होऊ लागले. अशोक आणि महादेवी यांच्या प्रेमविवाहामुळे दोन्ही कुटुंबात तणाव निर्माण झाला होता. त्यामुळे रक्षाबंधन दिवशी माहेरी जाऊन भावाला राखी बांधली तर दोन्ही कुटुंबातील कटुता संपेल, असे महादेवीला वाटले. त्यामुळे राखी आणण्यासाठी महादेवीने पतीकडे दहा रुपये मागितले. नेहमी मद्यधुंद अवस्थेत असणाऱ्या अशोकने राखीसाठी दहा रुपये देण्यास नकार दिला. महादेवीने पुन्हा पुन्हा दहा रुपयांची मागणी केल्यावर अशोकने महादेवीला शिवीगाळ केली आणि तो घरातून बाहेर पडला. पतीने दहा रुपये दिले नाहीत ही गोष्ट महादेवीने मनाला लावून घेतली आणि महादेवीने गळफास घेऊन आत्महत्या केली.
No comments:
Post a Comment